坐低睇餐牌，見啲1人套餐有飯有湯有豆漿飲，個湯仲可以轉菜肉雲吞，先60蚊咁抵，就焗住嗌個黎試吓。點解係焗住呢？因為我本來只係諗住食糖心蛋架咋...
喺香港食回鍋肉，係有2種嘅，1種當然係舖頭自製嘅回鍋肉啦；另一種就係罐頭回鍋肉。雖然後者有好多牌子，但味道唔差太遠嘅，一定食得出。而呢間舖頭嘅回鍋肉菜飯就令我相當驚喜，竟然係自製嘅，而味道似足罐頭一樣！
點解咁肯定佢係自製嘅呢？因為罐頭回鍋肉有3個特點：
1超多筍超少肉
2肉九成係瘦肉
3淨返一成肥肉係毫無咬口嘅肥膏
而呢度嘅回鍋肉同筍份量係55波，肉係半肥瘦，肥肉係有咬口嘅，所以肯定唔係罐頭。之但係佢嘅調味係同梅林牌幾乎一樣嘅，實在非常特別。
本來係冷盤嘅糖心蛋，仲後過菜飯上，但我就唔介意嘅，食落蛋白位有微咸醬汁味，蛋黃夠流質，夠甜味，就係咁簡單，已經好好食，20蚊一碟算平。不過佢味道似日本拉麵店嘅流心蛋多過滬菜。
至於原本係「例湯」嘅菜肉雲吞就最後先黎，味道不過不失，餡料算豐富，仲有3粒咁多，已經食唔落喇，打包咗半碗飯走。埋單之前先記得飲杯豆漿，唔知係咪天氣太熱，好似已經開始變壞，所以剩低大半杯冇飲到。80蚊，野食唔錯，份量又多，真係抵食。
