::: 蝦餃 :::
飲茶必叫點心之一, 蝦餃皮比較乾身, 好易夾起不過黐住筷子, 扣咗少少分~ 不過味道尚算好味, 蝦都幾大隻新鮮~
::: 燒賣 :::
飲茶必叫點心之二, 燒賣上嘅肥豬肉雖然太多, 但係要咁樣先食到燒賣應有嘅精髓~ 好大粒啖啖肉, 絕無吝嗇, 要彈嘅只係燒賣上面唔太新鮮嘅蟹子, 有點畫蛇添足…
::: 牛肉球 :::
落足料, 又蔥又馬蹄, 都幾香芫茜味, 唔算好特別, 中規中矩~
::: 潮州粉粿 :::
潮州茶樓當然要食潮州粉粿啦, 特別在佢冇乜韭菜, 所以顏色比較齋, 但係食落味道反而幾香, 唔錯~
::: 小籠包 :::
小籠包就失色, 一來皮唔夠薄, 而且又係好乾~ 二來冇乜肉湯, 裏面嘅豬肉亦唔夠味. 凍咗食仲衰添, 一舊粉咁…
::: 叉燒腸 :::
味道都唔錯, 可惜粉皮太厚以致腸粉中間部份好淡… 叉燒唔算新鮮不過可以接受~
::: 鴨腳扎 :::
我地冇食到, 屋企人都食淨咗, 睇賣相麻麻…
::: 流沙包 :::
流沙程度都ok, 唔可以話做得好出色, 入面奶黃有少少凝固咗, 都幾香甜啦~
::: 咸水角 :::
入面嘅料好似俾人偷咗咁, 得好少, 又凍咗… 變到一咬落去好黐牙. 差差差~~~
::: 鮮蝦腐皮卷 :::
反觀呢一碟有驚喜, 蝦都係好新鮮彈牙, 最重要竟然連腐皮都做到好脆口感~ 腐皮同蝦夾埋好鮮, 又熱辣辣, 呢個值得一讚~
::: 蘿蔔糕 :::
呢個都好好味~ 蘿蔔同粉份量平等, 最憎食到一口粉而又冇蘿蔔肉~ 煎嘅時間亦剛好, 外脆內軟, 一流嘅咬口, 亦值得一讚~
總括食物方面唔算係好出色, 不過總比喜悅好一大截~ 坐得都幾舒服, 又唔係好嘈, 竟然母親節都唔駛等位, 又唔會趁機加價, 我地決定咗父親節再黎過~
