釗記海鮮小菜

營業中

休息中

一行四人想食海鮮， 揀咗喺大埔墟街市嘅釗記海鮮。 揀咗呢間餐廳係因為有朋友介紹，佢話呢度啲海鮮好新鮮 ，師傅嘅手勢好好，調味剛剛好，香口得嚟唔會太過油膩，惹味得嚟唔會好咸，食完唔會有口渴嘅感覺！師父推介我哋食薑蔥炒蟹。佢話好多人都讚佢呢道炒蟹。的確係好食！份量好大份，應該有成三隻蟹， 蟹肉超多，肉身肥美，超多蟹膏，仲要係橙色嘅蟹膏， 唔係綠色好肉酸嗰啲蟹膏！啲薑爆到好透好好味，食落唔辣口。啲葱同配料都吸曬蟹嘅精華，好出色。豉油王大蝦碌。個蝦好新鮮， 每隻蝦碌都好大隻，肉爽，佢用豉油加蒜爆香咗個蝦身。蝦頭又有橙色嘅膏，我like! 呢度菜好惹味。個朋友真係冇介紹錯，師傅的確係幾好手勢。同師傅閒聊咗幾句，佢話未有疫情之前，其實佢嘅鹵水都好多人叫， 而家四人限聚，好少人叫鹵水食。希望疫情快過去， 到時拉齊七八個人去食佢啲鹵水！