金鶴拉麵 (九龍城道) (已結業)

一直都想試吓金鶴拉麵，尋日咁啱去開土瓜灣就去咗試。鋪頭近街市，本身諗住係一入門口得幾個位嘅拉麵小店，但一入到鋪頭嗰陣成個環境同出面條街嗰種舊區嘅感覺好唔同。喺出面睇只係一間平平無奇嘅拉麵店但係一入到去就開始有驚喜：鋪頭以黑色為主調，一入去右邊就見到師傅喺吧枱前面整緊拉麵，行前多幾步店員安排左我哋喺上幾級樓梯嘅位置度坐低，環境十分幽靜。店員問我同朋友去咗洗手間未，我馬上好奇並且去咗參觀，唔知係咪新開關係，廁所大得嚟非常清潔整齊，而且好有日式風格。 早已經聽過呢度嘅鰻魚飯要盡早order，如果唔係就要等好耐，所以一坐低就已經即刻點左極濃雞白湯拉麵同鰻魚飯。雞白湯拉麵同極濃版本差$40左右，店員話極濃版本係普通雞白湯大概兩倍濃度，果然嚟到真係有驚喜，雞白湯超鮮甜兼且打到起晒泡，比我之前喺另一間主打做雞白湯拉麵店食嘅湯底更加濃郁。順帶一提，雞白湯拉麵入面已經有好多叉燒同雞肉，我最後係食唔晒嘅😝鰻魚飯亦都令我喜出望外，魚質彈牙而且個汁好入味，最重要係師傅已經將鰻魚去晒骨，唔使擔心食食吓會有好細嘅魚骨。我同朋友都非常滿意今晚餐飯，唔知道其他分店係唔係都一樣水準呢？一定會再回頭食佢個拉麵！！