老川皇

營業中

休息中

天氣凍就想食辣野，同事就推薦呢間四川菜話正宗又抵食，放工即刻同女友去試吓。鋪頭喺樓上，地方都幾大坐得舒服，普通小菜餐廳格局。最驚喜係竟然見到牆上邊寫住有藍妹嘅生啤！少見喎！唔使諗即刻叫杯！天氣凍梗係要食返啲暖胃嘅嘢，水煮就啱晒啦。魚片都有三款可以選擇，普通魚到桂花魚都有，我哋就叫個普通嘅試吓先。其他就叫咗干鍋肥腸，坨坨肉，同埋涼拌萵筍絲，全部叫左中辣。首先嚟嘅就係小食涼拌萵筍絲，估唔到咁大碟！萵筍夠爽口，調味酸辣得來帶點麻勁！開胃！試一啖藍妹生啤，果然好飲過樽裝，爽口又夠氣！同川菜配搭天衣無縫。水煮魚上到枱都仲係滾嘅，正！而且係睇得見咁足料，花椒麻椒夠多且香！但食落又唔會話太過刺激，辣得來夠暖胃但又唔會冇晒味覺。估唔到既係普通魚都咁滑，而且魚皮充滿骨膠原，口感q彈，女士恩物。如果入邊有埋薯粉就更加完美。干鍋肥腸原鍋上，又一熱辣辣之選。豬腸夠晒肥美，超惹味，送酒一流。辣子雞就食得多，坨坨肉原來就係辣子排骨！呢道菜就算叫中辣都辣度十足。青椒都充滿麻辣嘅味道，排骨炒得亦都好香口，鍾意食辣嘅朋友一定滿意。估唔到旺角都有咁出色嘅川菜，女朋友都話正，今次真係要多謝同事嘅介紹。