拾味正宗刀削麵館 (歌賦街) (已結業)

喺上環見客前想同同事食個快閃lunch, 喺九如坊附近揾食。秋涼喉嚨乾乾地食個熱湯啱哂，行到歌賦街嘅拾味正宗刀削麵館勁吸引，啱哂我地想快靚正！入到門口好多外賣🥡等緊，好彩店員話堂食都好快唔駛點等！餐牌主打當然係刀削麵，套餐價錢大約 45-60蚊！ 加飲品都係 6-10蚊！中上環呢個價錢簡直係超值！上海雲吞刀削麵 $45 全部刀削麵即叫即整，傳統嘅上海雲吞睇個外型就知皮夠薄、餡夠靚，咬落去啖啖鮮肉同菜好香口，主角刀削麵非常煙韌又好掛湯！湯頭唔算太濃味道適中，一啖麵一啖湯好暖胃！麵嘅份量仲好足！推介！ 東坡肉加肥牛熱拌刀削麵 $70  超強嘅東坡肉，肉味香濃而且忟到好軟嫩～一咬就散非常入味！肥瘦均勻仲有兩大件！跟餐加$10加左肥牛，份量好足，配搭埋自家製嘅四川担担醬更惹味！配埋煙韌彈牙嘅刀削麵食真係超夾！辣醬嘅辣度啱啱好，刀削麵撈埋醬一齊食完全唔乾！唔錯！ 小食：涼伴海蜇 $40 清新爽口嘅小食！必點！