試新餐廳之前，我通常都會上網做功課，揀定D熱門食物，今次都唔例外。首先必點嘅係串燒拼盤，可以試哂豬牛雞串燒之外，仲可以試埋豬頸肉，岩哂心大心細嘅我😅。
串燒拼盤 $148
串燒麻麻，偏向乾身；豬頸肉中規中矩，肉質未去到好爽但又唔會好淋，不過份量唔少。
辣椒膏豬頸肉炒飯 $72
1
上枱果陣有少少失望，因為豬頸肉已經切成碎粒，雖然份量唔少，但存在感偏低。整體個炒飯幾唔錯，好有鑊氣，而且夠乾身，屋企人話最好味係佢🤤。
鮮蝦炒金邊粉 $88
1
本身唔係好想點金邊粉，事源有次係上水食過一個超難食嘅偽泰式炒金邊粉，而產生陰影後，就唔敢係新餐廳試金邊粉。不過今次見佢其他食物質素都正正常常，一於試埋佢。
炒粉都好有鑊氣，加埋辣粉好惹味，蝦都爽口，不過無乜蝦味，而花生碎就有少少變味，盡量唔好撈埋黎食就無問題。
冬陰功明爐海鮮鍋 $148
呢個幾特別，明爐熱住黎食，冬天食岩哂。海鮮有青口、大蜆、蝦、魷魚，另外有大量秀珍菇，底部有粉絲。海鮮味道好一般，稱唔上鮮味，蝦無梅、蜆無沙、魷魚無雪味已經過關，呢個價錢唔會預佢用新鮮料。冬陰功湯偏甜，個人中意酸D同辣D😏。
泰式墨魚脆豆卜 $58
我好中意食長洲碼頭附近個炸魚肉釀豆卜，外脆內軟，所以對呢個墨魚滑釀豆卜充滿期望。可惜，豆卜大大舊，但墨魚滑釀少少，成舊野炸到裡裡外外都乾哂，入口乾爭爭，無墨魚味，只有豆卜味。
當晚4位，人均$140，每碟野份量都算多，我地4個人share岩岩好。一致認為炒粉炒飯最好，夠鑊氣。
