木火堂 (已結業)

好耐冇食過日式燒肉，去咗灣仔木火堂，地舖係居酒屋，樓上則主打燒肉，環境隱秘，只有3張檯，私隱度高！點咗燒肉套餐($678/一人份），包括：A5宮崎和牛、美國prime牛小排、澳洲M7和牛牛板腱、北海道黑豚肉、季節海鮮、日本產野菜盛合。呢度用上炭火燒，更有風味！套餐有3款牛，A5宮崎和牛同美國prime牛小排油花好多，分佈平均，肉質嫩滑多汁，入口即溶！澳洲M7和牛牛板腱肉質軟腍，肉味最突出。供應嘅北海道黑豚肉係五花腩位，最適合燒烤。黑豚肉腩好厚身，燒至金黃焦香，入口爽口彈牙，口感甚佳！海鮮有一隻帶子同一隻大蝦，食材新鮮。人大咗，食燒肉一定要食D菜！日本產野菜盛合有菇、翠玉瓜、南瓜及秋葵，款式都幾多，燒D菜無咁漏！要留意嘅係，喺樓上舖食，雖然私隱度高，但有時店員會唔喺度，變咗落單或者有其他需要會完全搵唔到人，呢一點都幾唔方便，建議餐廳諗下人手安排。