小火焰韓式咖啡廳 (樂富廣場A區) (已結業)

早排去咗樂富見客做嘢，要見客就當然要搵一間舒服嘅餐廳可以坐低慢慢傾野啦！於是行吓行吓就比我見到呢一間小火焰韓式咖啡廳！睇咗餐牌覺得食物都幾吸引同埋價錢合理，所以就走咗入去試吓啦！首先出場嘅就係呢一個香芒炸雞沙律！呢一份沙律好特別，上面嘅芒果肉好甜好多汁！而且配合埋呢度嘅炸雞，韓式嘅炸雞果然係特別出色！然後加埋下面嘅沙律菜一齊食，清新嘅口味加埋雞肉嘅肉汁，真係好夾！仲叫咗一份原味韓式炸雞！韓式炸雞再配合埋兩個醬汁一齊食！我自己偏愛鍾意蜜糖芥茉醬汁！呢一個醬汁嘅甜辣味道好吸引！炸雞翼都外皮炸得金黃鬆脆！咬入口嘅時候，雞肉嘅肉汁湧晒出黎🤤真係好食到流晒口水！套餐仲包括左呢一個牛肉石鍋飯 ！呢一個牛肉石鍋飯分量十足，上面嘅牛肉亦都好林好香！石鍋飯入面仲有其他唔同嘅配料，撈埋一齊食味道層次分明！