老樹旗艦店 (已結業)

行開佐敦有見到有間食榴槤主題嘅甜品店，作為榴槤fans緊係要去試試。今次試左特濃榴槤蛋糕、榴槤芝士撻同埋榴槤焦糖燉蛋，不論係環境同野食都非常有驚喜，喜愛榴槤嘅朋友一定要bookmark定。先講下環境，一入到店鋪，落完單叫野食，店員就帶我地行左兩層樓梯上去坐，樓梯間嘅裝潢同埋音樂都不其然有一種熱帶嘅感覺，準備為一陣嘅甜品揭開序幕。店員推介左特濃榴槤蛋糕，表面一層可可粉，配上班蘭蛋糕同大大啖榴槤蓉，香濃榴槤味同蛋糕非常match，唔會太甜，又襯托出貓山王嘅鮮味。榴槤芝士撻，滿足左我呢個芝士腔，芝士配上榴槤油而不膩，creamy得黎又唔會喧賓奪主，酥皮奶味濃郁，最重要係榴槤份量絕對唔吝嗇，令人齒頰留香。至於榴槤焦糖燉蛋，係燉蛋入面加入榴槤，榴槤同蛋嘅比例大約係37，蛋味好香，但都可能係呢個原因令到榴槤嘅味道突出唔到，略嫌有少少主次不分，但整體不失為一個幾有熱帶風味嘅法式焦糖燉蛋。