榴槤芭 (已結業)

上ig見到呢一間舖頭係用馬來西亞直送貓山王，咁啱喺附近就去幫襯下。餐廳位置唔算好近地鐵站，但係都唔算好遠，亦都好易搵。老板娘好熱情，餐牌上面幾乎每一樣都解釋比我地聽係咩黎，因為餐牌得款式名同圖，齋睇可能唔知咩黎。我地兩個人叫咗一個「榴槤到法國」，一個「雪中槤」。其實即係榴槤法式焦糖燉蛋同埋榴槤燉奶。先講左個榴槤法式焦糖燉蛋，個燉蛋本身蛋味都好濃郁，上面焦糖好似薄咗少少，厚翻少少就好啦，不過燉蛋整體問題都唔大，係幾好食。到個榴槤，真係好濃，同街市賣啲金枕頭爭好遠。問左老闆娘，原來係貓山王，食完一啖，會有少少甘，之後榴槤陣香味會停留喺口腔好耐。一齊食就係兩個好濃郁嘅味道，而裝飾嘅藍莓帶少少酸，咁啱可以中和咁濃嘅味道，而又唔會好衝突。之後就到個榴槤燉奶，個燉奶奶味都OK，甜度都啱啱好。本身以為個燉奶會溝淡個榴槤味，點知仲濃左，而個口感係好似好creamy嘅cheesecake咁，唔會好稀又唔會漿住個口咁。整體黎講，食物質素幾高。價錢都唔算好貴，下次經過會再試。