隆姐泰國美食館 (已搬遷) 新店位置

放工後撘地鐵到九龍灣睇戲，睇完再到九龍城食飯差不多成為每個星期五既指定景點。今次睇既係森魔，看畢後只覺導演被"鬼眼大導演"之名所累，拍成一套兩頭唔到岸既電影，有些許失望。跟女友一早議好試試隆姐泰國菜，所以能夠爽爽快快入店，難得！由於見店鋪作收工狀，同女友亦識趣地快快點菜，又係難得。海鮮乾炒河($36）份量略細，材料為魷魚、青口、蝦、蛋，河粉炒得乾身滑口，醬汁惹味且兜得均勻，唔會做成邊濃邊淡味，不過稍嫌鑊氣唔夠。蝦刺身($58)一客十隻，兩個人食都算過足癮，蝦肉肉厚爽口，雖則不算十分鮮甜，但對比起隔鄰既苖籽葉己高出一班了，加上炸至鬆脆既蝦頭，絕對值回票價。串燒豬雞($35）一客各三串，醃味唔錯，表面略略燒焦，甚得女友歡心，本人比較喜愛串燒豬多一點。蝦醬炒飯($36）碟邊有炸泰國臘腸同肉鬆。炒飯蝦醬味恰到好處，同女友出現爭食情況。飯中夾雜點點紅色物，初時以為乃紅薑，食落發覺味道咸咸的，細看下原來係細粒蝦毛，好可愛。其後店員奉上甜品南瓜西米露，味道清甜，好好味！真想厚住面皮再要一碗。埋單合共$165 ，食得飽飽，想唔肥都難。