MGB by Manhattan Grill & Bar (已結業)

今次黎到觀塘一間西餐廳搵好野食，餐廳格調時尚，亦設有戶外進餐區，好似酒吧咁！侍應非常好客，同我地有講有笑，又介紹啲好野食俾我地。係上餐前先食餐包同埋鬆包，外脆內軟，熱辣辣既餐包再塗上牛油，岩岩好！前菜我地點左一個蟹肉龍蝦湯同埋巴馬火腿蜜瓜。個湯就熱辣辣、擔擔肉；而parma ham melon既火腿唔會太咸，再連埋清甜既蜜瓜一齊食，簡直就係絕配。跟住我地就叫左生蠔黎試下，今次點左三種生蠔：澳洲塔斯曼尼、法國神聖之蠔同埋法國美人魚。三種都肉質肥美鮮甜，帶有奶油味，而且味道濃郁，非常易入口。主菜我地就叫左扒大蝦蘆筍意大利飯。兩隻大蝦非常鮮甜爽口，而意大意飯帶有蘆筍既清香，濕度剛剛好。另外，我地仲叫左頂級天然安格斯肉眼扒。餐廳員工推介我地試下五成熟，開頭以為會好生好多血水。但食完發覺牛扒唔靱、而且非常有肉汁、好香！仲有炸到岩岩好唔會太油既薯條配！依間餐廳既價錢雖然唔係特別平，但勝在餐廳裝修、員工態度同埋食物質素都有保証，絕對值得一試！