La Bons Cafe (已結業)

聽一位朋友介紹專誠船街試依間餐廳，去到己經發現生意幾好，門口等滿人。由於我只係一個人去，所以最遲先至獲得安排入坐，依方面我諗佢要改善一下。不過店員都算識做，有向我賠個不是，所以我都唔太計較。該店環境不俗，原來隔離鋪位都係佢，所以別有洞天。我叫了一個最平午餐A，係意粉配日式炸蠔，雖然配搭有奇怪，但味道不錯。湯同麵包不過不失，而餐飲都算大杯，整體講以五十幾蚊價錢兼唔收加一，的確算抵食。但我想講下依間食肆服務，佢其實都算好誠懇，而且做好有拼勁，不過就硬係同佢餐廳類型格格不入。門口招呼位哥哥好有霸氣，好似做開大排檔咁；但入面巡位妹妹就相反，驚青到唔敢同人講，連落單都要人幫手；轉菜阿姐九成之前係做酒樓，成日好似超音鼠咁走走去，我始終都睇唔清楚佢盧山真面目；最後埋單個叔叔同樣有趣，佢唔係冇禮貌，但佢真係好大聲，搞到我彷似置身一間港式茶餐廳一樣。誠如其他食客所言，依間餐廳其實都有潛質，但如果要做到一間標準意法式餐廳，佢無論菜譜同員工訓練上都要再落功夫。