山打根 (已結業)

將軍澳南好多美食，今日行完Donki攰攰地，見到樓下有間餐廳個名幾特別，而且價錢幾親民，就入咗去試下。原來山打根係東南亞嘅地方名，餐廳菜式多元化，有印、星、馬、泰東南亞風味，而且仲係由前高級酒店主廚主理。菜式主要油量較少，味道較清淡，不過就落咗大量香料，如芹菜、芫荽、芽菜、南姜、蔥、辣椒等，所以全部都好惹味。麵底可以選擇：河粉、 粉絲、銀針粉或摻摻等等，都好多選擇。招牌海蝦煎蛋湯銀針粉 好香濃嘅湯底，蔥油則是用新鮮的青蔥、老抽及生抽豉油、乾蔥、青蔥頭、芫荽頭、八角、肉桂、老抽、豉油和冰糖等多種調味料熬製而成，每啖銀針粉都嚐到香濃嘅湯底，仲有來自泰國嘅新鮮大蝦，非常美味。香茜胡椒花甲蜆湯 一上枱見到好多肥美嘅花甲，聞到湯底有濃濃嘅胡椒味，湯面仲灑滿了乾蔥、薑絲、芫荽同辣椒絲，新鮮嘅花甲好香甜，同湯底胡椒味好相配，仲有粉絲吸收花甲嘅鮮甜，好有層次感。美祿恐龍西多士邪惡嘅食物—西多士，外面已經有美祿香氣，西多士炸成金黃色，每一口都嚐到美祿以及糖漿的味道，有幸福的感覺。美祿鮮蛋好特別，係美祿加雞蛋，甜甜嘅美祿配上滑溜溜嘅雞蛋，口感特別。