影片
更多
2021-04-26
1422 瀏覽
約番啲同學出嚟食飯，大家一嚟就揀返呢間，因為以前都食過大家都想再encore。環境方面呢就四四正正，坐起嚟舒服，不過呢就有啲逼，同隔離枱嘅距離比較近，而餐廳環境都比較熱鬧。但係總括而言呢我自己就唔覺得咩大問題嘅，因為呢間啲嘢好食同埋上菜快。唯一唔好嘅呢就會係要等得耐，所以呢預約定係非常之重要。嘢食方面呢我自己就冇點食過東北菜，唯一食過呢間令我印象非常之深刻，佢嘅菜式好有特色，就算係平平無奇嘅菜品，都會令你有一種回味嘅感覺。咁首先講碟醉雞先啦，因為實在太肚餓喇食咗少少先影相，佢肉質結實但係又唔會係死實嗰種，質感啱啱好。溫度來講唔會太凍，食落口唔會有個種雪咗好耐嘅感覺。而關於個醬汁方面啦，酒味濃郁，香味撲鼻，入口嗰時呢都會覺得口腔裏便都係比呢種醉雞味充斥着，但係又唔會太霸道。仲有一點，我個人覺得因為雞皮有尐脂肪，對我個人而言呢就覺得非常惹味，夠晒肥美。上面幅相左上角，係清炒萵筍，咁呢就唔會話好鹹真係清清淡淡嘅啫，但係呢反而食到萵筍嗰種爽甜咁，同事又唔會話係青澀味太重。當食其他菜食到一半覺得有尐太重口味嘅時候，食返兩條萵筍呢對我來講就啱啱好中和咗少少，可以繼續戰鬥。如果你自問食嘢都比較清淡啲
環境方面呢就四四正正，坐起嚟舒服，不過呢就有啲逼，同隔離枱嘅距離比較近，而餐廳環境都比較熱鬧。但係總括而言呢我自己就唔覺得咩大問題嘅，因為呢間啲嘢好食同埋上菜快。唯一唔好嘅呢就會係要等得耐，所以呢預約定係非常之重要。
嘢食方面呢我自己就冇點食過東北菜，唯一食過呢間令我印象非常之深刻，佢嘅菜式好有特色，就算係平平無奇嘅菜品，都會令你有一種回味嘅感覺。
咁首先講碟醉雞先啦，因為實在太肚餓喇食咗少少先影相，佢肉質結實但係又唔會係死實嗰種，質感啱啱好。溫度來講唔會太凍，食落口唔會有個種雪咗好耐嘅感覺。而關於個醬汁方面啦，酒味濃郁，香味撲鼻，入口嗰時呢都會覺得口腔裏便都係比呢種醉雞味充斥着，但係又唔會太霸道。仲有一點，我個人覺得因為雞皮有尐脂肪，對我個人而言呢就覺得非常惹味，夠晒肥美。
上面幅相左上角，係清炒萵筍，咁呢就唔會話好鹹真係清清淡淡嘅啫，但係呢反而食到萵筍嗰種爽甜咁，同事又唔會話係青澀味太重。當食其他菜食到一半覺得有尐太重口味嘅時候，食返兩條萵筍呢對我來講就啱啱好中和咗少少，可以繼續戰鬥。如果你自問食嘢都比較清淡啲，或者係朋友食嘢清淡啲咁就真係要嗌返一碟，可以慢慢食。
中間呢碟就係鎮店之鴨，來親都必食㗎啦都唔使我講咁多，咁佢肉質就真係好結實，咁要配埋右上角嗰碟蔥同青瓜點返啲醬，再將餅皮包圍晒佢哋塞入口，完全係幸福咁滿滿！不過美中不足嘅係，個鴨肉肉有時好大嚿食食吓會覺得有啲柴口，要加多少少青瓜先至中和到幹嗰種感覺，我自己未食過其他嘅片皮鴨，唔知係咪正常啦。我自己就好鍾意嗰種啖啖肉嘅感覺，所以又覺得冇乜大問題。
係成碟有中間嘅鴨皮，就係脆口同埋唔會太乾嘅，不過可能有啲人健康啲就會嫌佢油得滯。呢尐口味嘅嘢見仁見智啦。
咁上面碗鴨嘅左上方，就係雞絲粉皮，我自己本身唔太鍾意食嗰種芝麻醬，感覺對我來講就不過不失。不過呢要講嘅係個雞肉呢係好嫩口嘅，加少少青瓜絲口感清爽尐，如果你平時都好鍾意食呢種菜都可以諗吓嗌返個，同埋大大碟都夠飽肚。
跟住就要講呢碟肉皮凍，上面嘅醬汁係蒜蓉、蔥花、同豉油之類嘅嘢（我諗係秘製醬汁啦）。皮肉凍裏面係滿滿嘅膠原蛋白，而長條狀嘅物體就係豬皮啦，感覺係q彈嘅，好似10幾歲嘅小朋友嘅面珠墩一樣(哈哈好血腥添)。味道好特別，就好似肉版嘅龜苓膏，但係又腍啲嘅。
加埋啲醬汁一齊食都幾得意，呢碟係我朋友最鍾意食嘅餸每次嚟到都一定嗌佢，如果你平時都鍾意食呢啲啫喱狀嘅嘢咁就一定要嗌佢嚟試返下啦。
最後要講嘅係呢個黃金南瓜，佢裏面係一條條炸到淋嘅南瓜，外面係用鹹蛋黃製成嘅炸漿。脆硬集於一身，食到舐舐脷之餘，又唔會好膩。必試嘅菜式，但真係要趁熱食啊。
本身呢幾位朋友就唔太食辣，我食辣呢就嗌咗碟水煮牛肉試下。可惜牛肉就有啲韌，朋友食咗一舊就停咗手。我自己就覺得咬吓都幾正，又唔會話好似香口膠咁嘅。個湯就正常發揮， 夠晒辣，冇乜麻。我自己食開辣都食到成頭汗，如果平時唔係食開辣就要留意啦。配菜方面，其實底嗰啲係白菜同薯粉，好可惜個幼薯粉呢煮得太腍，我自己覺得冇乜咬口，夾起嚟嘅時候都好易斷，如果係粗薯粉可能好啲嘅。啲菜就正路入味啦，攞嚟同啲肉一齊食就啱啱好。
其實上一次食酸菜魚都已經覺得冇想像中咁出色，今次食埋個水煮魚呢，我覺得佢啲小炒可能比湯菜更加出色，不過食嘢就各人口味嘅啫如果係第一次去不妨都嗌返個試吓過吓癮！
本身侍應冇同我哋講還枱時間，不過去到一個半鐘左右就提醒我哋要交枱，完全能夠明白㗎，因為出邊呢都有好多人排緊隊。但如果係想同朋友搵個地方慢慢嘆慢慢飲番杯嘅話，就可能呢要搵吓其他地方。
同時都好可惜因為咁我哋冇好好控制時間食埋甜品。上次食甜品呢都覺得幾出色，但係我已經唔記得叫咩名lu，如果下次有機會食就有喺度寫埋。
雖然冇影到，但係同朋友喺度都飲咗幾支啤酒，啤酒方面有藍妹同青島支裝揀，如果平時都有貪杯嘅習慣，就唔好錯過啦。
埋單每人百幾蚊，喺香港來講算係非常之抵食，至少冇邊度啲片皮鴨可以有呢個價掛，所以係犯聚之選
張貼
