金堂韓國料理 (已結業)

個日同班朋友入西貢玩完，諗住醫肚，行過西貢好出名的食街睇下有咩好食，見到有一間韓國菜館，好多人，於是我地就等位試下。咁多人真係有原因架，D嘢真係好好食，個石頭飯好野味，材料又十足再加埋D辣椒醬，正﹗﹗仲有個個炆牛肋骨煲，到而家我諗起都會流口水，佢D牛肋骨炆得好入味，好鬆軟，D汁用來撈白飯一流。我地仲叫咗個海鮮煎蔥餅，好足料，同出面我食過個D完全唔同。越食越想食，一D都唔會覺得油膩。仲有個人蔘雞湯，D湯一飲就知道無落味精，好鮮甜，隻雞個肚入面仲有糯米同人蔘。再來多個蛋包蝦，隻隻都有手掌咁大隻呀，又爽，再點佢地個個特製豉油，配得非常好呀。跟住我地仲叫咗四杯柚子茶，好好飲，完全同我地係出面買一瓶瓶個D唔同，埋單個時我地問老闆娘點解咁好飲，原來佢地D柚子茶係老闆娘個奶奶係韓國親手種，空運來香港架。老闆同老闆娘都係韓國人，但係佢地都識講廣東話，而老闆娘係香港做韓國廚師已經做咗差唔多二十年啦，怪唔知得整D嘢咁好食啦，真係好正宗。我而家一有時間，就會同D朋友入去食飯架啦。