丸十寿司日本食堂

營業中

休息中

朗豪坊美食推薦😍成日去朗豪坊，竟然唔知12樓有間好高質嘅日本料理 -- 丸十壽司。佢其實唔止壽司食，應有盡有，我哋lunch time去嘅，人唔算多，有套餐可以揀☺️我哋揀咗特上海鮮丼定食、壽司+刺身定食，仲有串燒同炸魷魚，仲有個好特別嘅壽司漢堡。推薦呢款海鮮丼，好豐富，鮮甜嘅海膽、大大隻嘅蝦、好味嘅帶子同厚切三文魚、再加上粒粒三文魚籽、啖啖蟹肉。。。真係好滿足😌而另一份都好足料，有刺身、壽司，再加嗰迷你鮪魚丼，啲魚蓉鋪滿成個碗，每啖都好香口，啱晒鍾意食鮪魚嘅朋友。午市套餐包湯同沙律，仲可以加錢加小食同飲品，我哋就加咗份勁厚切嘅三文魚刺身同勁好味嘅魷魚酥，估唔到佢嘅炸嘢整得咁好食，一定要加。除咗魚生，串燒都係唔錯嘅選擇，我哋就揀咗雞拼盤，入面有齊雞肉、雞翼、雞皮、雞腎，仲有用雞軟骨整成嘅雞肉棒，呢個棒最好味。最後要介紹吓個壽司漢堡，原來好大份，真係好似個漢堡咁，我哋揀咗炸軟殼蟹，真係成隻上，炸到金黃香脆，而上下兩層嘅米飯，都係煎過嚟，口感煙韌香脆，好特別。佢環境好舒服，食物都好唔錯，行開朗豪坊嘅朋友不妨一試呀。