富豪軒

之前喺富豪軒食過不下十次晚飯
鍾意佢環境闊落，食物味道亦都唔錯
所以今次試下飲茶
果然係一試難忘，再試投降
點心冇一樣出色
蝦餃淡而無味
同埋完全唔明點解可以做到好似小籠包咁有湯汁
真係第一次試咁新派嘅蝦餃
食完咸點，落單加多個紅棗糕
等咗大約廿分鐘，問侍應姐姐係咪漏咗單
佢淨係回覆話有落單㗎，等多陣啦
過多五分鐘再問另一位侍應哥哥
又係同一樣答案，再叫我哋等多5-6分鐘
前後等咗30分鐘
我以為自己叫咗隻火雞
最後真係唔想再等，叫佢哋取消
埋單嘅時候仲要同我講
「你唔要個紅棗糕，我幫你取消咗喇」
我話「唔係我唔要呀，係等咗30分鐘都冇嚟呀」
之後屋企人仲話聽到呢兩位侍應俾說話我哋聽
話「淨係招呼你一檯咩」「係要等咁耐㗎啦」
其實我覺得冇問題嘅
如果真係要30分鐘先做到嘅話可以喺落單嘅時候講清楚
而唔係要個客去追，仲要用咁嘅服務態度回應
咁嘅服務態度加食物質素
我相信絕對有更加好嘅選擇