Second Bite Bar & Grill (已結業)

雖然位置唔係話十分方便，但都唔算難揾，係長沙灣C2出口行過去都係十分鐘左右。一入到去就會見到兩張bar枱，餐廳都有cocktail提供，俾你同朋友吹下水飲下野，都幾relax。再行入少少就有正常食飯枱，係雲石花紋，睇得出都有用心簡過，枱同枱之間唔會好逼，樓底又夠高，講野大聲少少都唔會驚嘈到人。今次同朋友黎，一人叫左個主菜share黎食，份量都多，一定夠食，味道仲有驚喜添。叫左個波士頓龍蝦牛角包配雙色薯條同沙律。個人偏好蕃薯條，好甜好脆，牛角包仲好酥脆，講到重點既龍蝦，咬落去每啖都食到龍蝦肉，絕對唔係hea你，一個包入面得一兩啖龍蝦肉果D。另外仲叫左個大蝦濃汁意粉，個醬汁有好香濃蝦味，仲有好多海鮮，又有蝦、蜆同青口，唔好睇佢份量好似好少，食落其實好飽肚。兩個主菜都唔錯，超出我預期。