拉麵軍團 (已結業)

星期日同老婆到東大街諗住試下安利魚蛋粉，點知去到人山人海，唯有去第二間啦，見到對面好似新開張，原來係食拉麵既，有位拿拿聲入去啦，間舖地方細細得廿幾個位，牆身擺滿小擺設同清酒都幾有日本特色。拉麵有六款，四款豬骨湯，一款蝦湯，一款雞湯，我揀左地獄拉麵，第一啖緊係試啖湯，食得出好濃既豬骨味，再撈埋個辣肉球，連平時食得辣既我都差d頂唔順，不過又唔會遮晒本身既豬骨味，3塊叉燒肥瘦適中。老婆就揀左店員推介既蝦湯拉麵，話係每日限量供應，一上枱見到三隻好似手掌咁長既原隻大蝦，老婆話個湯好有蝦味，蝦頭入面仲有好多蝦膏添，隻糖心蛋都幾好味，下次要再試埋佢地d小食。