香港郵意 (已結業)

香港郵意喺尖東一個幾靜既商場入面，講真如果唔係最近有一個展覽喺嗰度，都真係唔知佢存在。上到去發現原來個場都幾大，中間做展覽，側邊都仲有好多座位。後面有好多明信片睇，好本土，仲可以即場寄，遊客黎一定覺得好好玩。搵咗個位先去睇menu，呢度同好多cafe一樣都係自助既，睇啱就去叫，之後佢會比舊野你拎返去坐住等，唔洗戇居居企喺度，好方便。而且今晚同舊同事食飯，好耐冇見，梗係捉緊機會起勢咁講野啦。講咗一陣都餓，咁啱野食就到了，我叫既係卡邦尼意粉，濃郁既芝士鋪滿意粉面頭，但唔算好膩，意粉煮得軟硬度剛好。對面既係煙三文魚意粉，同樣都係極多芝士，不過煙三文魚肉質緊實帶點咸，正好同兩個同樣都係以奶油為基調既意粉調和。好老實講，喺輕食為主既cafe，主食做到呢個質素我就好收貨了。反而我對飲品會有多少少期望。我揀咗既係牛油果smoothies，入口好滑，有豐富牛油果既味道，真係鍾意牛油果既人一定唔會失望！呢度野食真係唔貴，所以在職貧窮都可以叫完正餐野飲加個甜品都唔肉赤！我地叫咗蘋果批加雪糕，蘋果批熱辣辣，甜度適中。