見好多人都有推薦火車牛魔粉，我呢個愛食牛嘅「牛魔王」又點可以錯過！呢個火車牛魔粉好大碗，足夠2-3人食，用料十足！ 越式粉麵最重要就係個湯，呢到嘅湯清清地唔會好油，咸甜度適中，我地要左金邊粉麵底，金邊粉煮嘅時間剛剛好，腍得黎係夾得起方便食用，金邊粉吸左啲湯好好味！
牛魔粉入面有安格斯牛、牛坑腩、手打牛丸、牛筋片、牛腩邊同牛柏葉，我最鍾意就係安格斯牛，好重肉味❤️第一次食牛腩邊，原來好有咬口，都幾好食。呢碗牛魔粉對於鍾意食牛嘅朋友黎講真係值得一叫！
除左主食，我地仲叫左特上小食拼盤同鹹蛋黃薯條。鹹蛋黃薯條嘅鹹蛋份量好多，香口但唔會好油膩，食完都唔會覺得好濟👍🏻
特上小食拼盤有6款小食，分別係炸牛油雞翼、春卷、手打蝦餅、炸扎肉、扎肉串、椒鹽軟殼蟹。整體味道都幾好，當中我最鍾意春卷、手打蝦餅同扎肉串。春卷外皮炸得香脆，一咬食到好多蔬菜絲，好滿足！手打蝦餅好彈牙，蝦肉份量都多。扎肉串幾特別，第一次食，豬肉味香濃🤤
食完油炸物，飲番杯青檸梳打真係好refreshing，為晚餐畫上完美句號！
