Three on Canton

我屋企老闆生日，原本book咗上次果間buffet，但因為佢地冇生蠔，老闆又指定要食生蠔、龍蝦，咁就轉咗呢間食，之前食過幾次lunch，都ok，今次就試dinner。
一句講晒，「正常buffet」，冇驚嚇，都冇驚喜！係唔太抵食啫！buffet六點半開始食，你book幾點就幾點開始，根據咁多年食buffet經驗，呢種不分時段的，就梗係越早入去越好啦！
生蠔：有濃濃咸味(希望係海水味啦，我唔識分呀！)，但係好瘦，有幾隻好似得個皮咁⋯不過有三款，過得去啦！但食到8:00左右，得番一款蠔供應！

一開始有三款生蠔

龍蝦：都係好瘦，大部分都冇膏，有啲個身仲細過大蝦。只有第一輪係正常啲⋯有啲失望

1

最後一輪嘅賣相

火腿：巴馬火腿包住哈蜜瓜，焗你食一大舊野⋯

連埋咁大舊瓜食⋯驚你唔飽咁

羊架：好羶！最唔掂係唔熱！算啦！
湯：有忌廉南瓜湯(冇試)、花膠雞湯(ok)、冬陰公湯(好辣)、燉唔知咩鱷魚湯(唔敢試)！

唔熱嘅烤肉

片皮鴨：正常
鵝肝多士：塊多士可以淨係吸油，唔洗放入口。一樣都係唔熱，就算即刻煎起嘅都唔熱！

可以一試，個多士就用黎吸油就算啦，唔洗入口

黑松露巴馬臣芝士意大利粉：值得一試

黑松露巴馬臣芝士意大利粉

甜品：臨近聖誕，甜品區非常精美！不得不提呢間啲甜品超健康！唔甜！我拎咗幾款，都唔甜，直頭冇乜味！好想知佢地係用咩糖整甜品！

唔甜嘅甜品

朱古力噴泉

試咗白色果個，都係唔甜

心太軟：好食，仲可以加M字頭雪糕，一齊食，一流！
其他野我就冇乜興趣，尤其係個湯粉麵區，魚旦蟹柳腸仔⋯我做乜要比幾百蚊响酒店食？！

冇試

唔想試

仲有一點就係整潔比較差，客人跌咗食物响枱，係冇人執㗎，仲要啲waiter 見到都唔係好理，可能佢唔係果區就唔理掛！
廁所，好多個水龍頭都有啲紙巾碎，又有好多個都冇洗手液同抺手紙⋯又冇吹手嘅風機⋯想點！真係商場洗手間都不如！
老老實實，短期內都唔會黎多次，之前lunch質素都唔係咁，唔掛得啲人話越黎越差！

冇試