Y Show Tasty (已結業)

今日又黎到尖沙咀，厚福街餐廳林立，於是再黎呢到附近覓食。胃胃話我知佢想食西餐，望一望H8水牌，就決定係12樓嘅Y Show Tasty。餐廳燈光設計陰陰地，空間大，幾舒服，好啱情侶/三五知己黎食飯或者飲返杯談下心。第一個送黎嘅係Foie gras，份量上幾大方，多士有幾大塊，鵝肝就咁大塊，多士好香好脆，唔會好似d擺咗好耐嘅法包咁，硬到咬唔開，主角鵝肝亦好惹味，人口即溶，佢地仲擺咗少少果jam係到可以沾少少去食，酸酸甜甜，估唔到幾夾幾好食。Scallop portobello擺盤好有心思，幾賞心悅目，帶子煎得好香，只係有少少過咗龍，韌少少，不過無損佢嘅美味，大啡菇好嫩，切開好多汁，原本有少少驚會唔會好重草青味，但個人接受到所以Ok。主食係Carbonara，份量同樣大方，兩個嗌幾個前菜，再share一個主食都好夠，意粉上面有隻温泉蛋，撈勻之後，意粉creamy嘅醬汁，加上蛋香，超rich超好食。老闆同staffs 都好有禮貌同好細心，會成日主動幫忙加水，服務好好