囍碟 (已結業)

本來以為係普通餐廳，點知去先發現係一間有心思有設計既餐廳。呢度既老闆好喜歡南洋文化，尤其係以馬六甲為主，好似啲牆上面會用上一個個別緻既蒸籠做裝飾，出奇不意，但又好有現代美感。餐廳除左一般既野食之外，亦有唔同既cocktail提供，加埋輕鬆既音樂、昏暗既燈光，算係一個放鬆既好地方，可以慢慢hea住食hea住傾。首先叫左個黑松露芝士批，果陣黑松露加蘑菇既味真係好香，仲有好多香港人至愛既芝士，好正。跟住係印度式既炸魚薯條。點解係印度式？原來係炸粉度加左咖哩調味，點既醬亦唔係普通既他他醬或者沙律醬，而係特製既喇沙醬。辣辣地咁，冇平時果種滯既感覺。重頭戲--囍蟹飯，差唔多枱枱都會叫呢一道。蟹味好濃郁，再加埋新鮮蟹肉，倒埋啲冬陰功汁落去，真係超級惹味。而啲飯用左煮意大利飯既方法去煮，所以會有咬口啲，呢點真係睇自己食唔食得慣。餐廳比既份量好足，其實食到呢到都開始飽飽地，但又心陏陏想試多少少。結果又叫左個香茅雞翼，餐廳仲好細心咁將雞翼一分為二，方便進食。🤗🤗食完之後仲可以順便行下重建後既利東街，有機會一定再黎。