麻浦元祖 (已結業)

有人問我想食超值又美味的韓燒，有咩好介紹，我會介紹你去剛裝修好的“麻浦元祖”，未裝修前我已經幫襯好幾次。點解我咁講，先話燒烤套餐種類超多，有豬、牛、雞及海鮮任君選擇，價錢合理由3百幾至5百幾內，附送石鍋湯及白飯。今次我同K姐嚟過燒烤之中午，我哋叫了淨豬套餐，有護心肉、五花肉、豬頸肉及特上麻浦豬扒共4款豬肉，份量仲剛好。烤爐側邊有芝士粟米及泡菜雞蛋，邊燒邊煮，燒下肉又可食下泡菜雞蛋，味道都不錯，仲有芝士粟米包埋d肉一齊食超正。肉類方面，K姐喜歡豬頸肉，因為啖啖肉，質感爽脆，烤熟後加泡菜包生菜大口大口食， 滋味無窮。而我就喜歡食五花肉，烤到外脆，油脂從鐵板的熱度迫出，見到一滴一滴滴豬油漏出，相當邪惡，哈哈。講番個湯，我哋叫了泡菜辣湯，配一碗韓國白米飯。湯味濃郁，材料及辣味十足，味道真係好正宗韓國風味。至於飲品是單叫的，由韓國入口，我叫了烏龍茶，K姐叫了雪梨飲品，味道沒特別。裝修過後的麻浦元祖比之前更光猛，而且座位很闊落，全無壓迫感，大家可以自成一角，與朋友享受韓燒之樂趣。