牧羊少年咖啡館 (德福廣場1期)

營業中

休息中

牧羊少年咖啡館，相信好多人都去過，質素一向都不俗。而德福呢一間，應該係裝修得最靚嘅一間。睇完餐牌，覺得二人套餐抵食，因為$428已經包咗一個頭盤，一個主菜，一個意粉，仲有兩杯飲品同埋兩杯Häagen-Dazs雪糕。金沙鹹蛋黃鳳尾蝦：一客有成8-9 隻，大大隻，鹹蛋黃味好香濃。蒜香牛肉碎松露醬雜菇意大利粉：好香松露醬嘅味道，意粉煮嘅時間掌握得幾好，唔會太淋又唔會太硬，係略嫌淡咗啲啲。慢煮 BBQ 醬美國豬肋骨 伴 蕃薯條．普羅旺斯燉菜：個豬肋骨好厚肉，喜歡佢配襯蔬菜同埋番薯條，兩樣都好食，番薯條直頭停唔到口。餐飲估唔到有咁多選擇，睇極都睇唔完，我揀咗梳打濃縮咖啡，夠晒清爽。朋友的栗子燕麥奶沙冰，靚到不得了，打卡一流，估唔到呢兩樣都唔使加錢。甜品不用加錢的有Haagen-Dazs 雪糕杯，另外一份我們加了$48轉特濃半熟芝士撻，原本上枱嘅時候覺得好似唔抵，因為個芝士撻唔算好大。但係食完之後就覺得好值，完全唔係平時街邊買到果種芝士撻，佢係鹹鹹地，入邊有啲好似煙肉嘅嘢，總之味道好複雜，但係又神奇地好好食。加埋一埋單$525 ，主菜有少少食唔晒，三個女仔都應該夠食。