A姐：$1題目，我最鍾意食嘅嘢？
M佬：打邊爐！
A姐：答啱！$2題目，我最鍾意飲嘅嘢？
M佬：梳打水！
A姐：答啱！$5題目，我最鍾意嘅男明星？
M佬：余文樂！
A姐：答啱！$10題目，我最鍾意嘅顏色？
M佬：黃色吖麻！
A姐：答啱！一百萬題目，呢度有幾多個笑哈哈...
好彩M佬唔識答，因為我都唔知呢度有幾多個笑哈哈，而且我更加無一百萬！呢度係邊度？就係旺角朗豪坊嘅SMILEY CAFE with eGG！
香脆炸蝦丸配雜菜沙律
熱辣辣嘅炸蝦球，外脆彈牙，香口得嚟又唔會好油，配埋泰式辣醬就更惹味。
蜜香雞翼配薯條
雞翼夠晒入味，而且蜜味香甜，5隻雞翼真係同M佬分唔勻。
蒜香蜆肉意粉
上枱個刻已經聞到好香嘅蒜味，蜆肉好多，仲有色彩鮮豔嘅三色椒，夠晒健康，不過，略嫌意粉份量太少。
香煎肉眼扒配薯菜
平時去餐廳据扒，叫5成會俾7成你，叫7成就會俾全熟你。呢度就啱啱好，叫5成嘅肉眼扒真係夠晒火喉。
肉汁鮮嫩，口感一流！
雲朵特濃朱古力
嘩！成舊雲係天空摘咗落嚟呀！呢個咁得意嘅雲就係綿花糖，而特濃朱古力好香濃好滑！
Smiley Blue 海洋檸檬梳打
除咗顏色好靚，好有夏日feel，最重要係夠晒解喝。
鮮芒果芭菲杯
食到飽飽又點少得甜品呢！呢杯芭菲除咗賣相好靚，更重要係用料十足，有甜脆嘅窩夫片、雲尼拿雪糕、忌廉、新鮮芒果、蜂蜜蛋糕、啫喱同朱古力脆片，口感豐富，食完真係好滿足。
