豐明苑粉麵燒腊茶餐廳 (已結業)

繼十一年前「刻不容緩」之後，今年小李子與容公主再次攜手合作開演唱會，小肥同honey係超級粉絲，當然要去捧場啦 ！收咗工，前往睇演唱會之前，二人先去咗醫肚。喺科學館廣場附近兜咗兩兜，眼見度度都企滿人龍等位，突然聽到有位伯伯大叫店內有卡位坐 ，我地諗都唔諗就跟咗佢入去「豐明苑茶餐廳」。食店主要都係食粥、粉、麵、飯。Honey叫咗碗河粉食，感想係「冇乜點，正常湯河一碗」。XO仔就清清地食咗碗免治牛肉粥。軟綿綿o既粥底配上嫩滑o既牛肉碎，甜濃又暖胃 ，個人覺得好滿足。喺茶餐廳度食碗河粉同粥，埋單每人$32，其實唔算平，雖然係有卡位坐，但間中有隻烏蠅陪食 ，舒適度迅即大減，故相對地唔會覺得特別抵食囉！