粉紅水門雞 (威達商業大廈) (已結業)

今晚出嚟旺角行街食飯，嚟到女人街呢一條小型食街，基本上兩邊都係唔同種類嘅食肆，花多眼亂，而呢間嘅價錢相對嘅吸引，唔同時間都係同一個價格，所以夜晚$36起，算吸引，裝修簡單，餐盒都係外賣模式，堂食外賣都可以用。我哋6；45左右坐低，時間上算早，我見7.15都基本爆滿，門口都要排一陣，亦有唔少係外賣自取嘅客人。依家$36去快餐店食晚餐都食唔到，呢個性價比自然好吸引。泰式粉紅水門飯，其實煮法上都有啲似海南雞飯，都係配上油飯，飯嘅份量好多，只係醬料上配上2款辣醬，雞肉亦算滑溜。滷水豬手飯，滷水汁唔會好鹹，送飯剛剛好，豬手半肥瘦，本來以為滷水蛋，居然係糖心蛋，質素都唔錯。青木瓜沙律細細份，但唔食得辣可能唔好叫。芒果糯米飯水準奇高，仲有兩款飯底，係紫米加糯米，味道亦10分正宗，性價比高。飲品又係好抵，亦係自家製，$8起，所以都試咗兩款唔同嘅茶，用嚟解辣都唔錯。