影片
更多
2013-06-13
33 瀏覽
中環人語，蘭桂坊喺俾遊客去參觀嘅飲酒街，雲咸街先至喺本地人飲酒嘅集中地 ，近幾年蘭桂坊對上一截嘅雲咸街，酒吧一間接一間開晌兩旁，一到收工就堆滿行人路中「歡樂時光」，極之熱鬧有氣氛，而且甚少有遊客滋擾。可惜，小弟唔好杯中物，都喺「為食」啱我本意啲，今晚就同幾位食友一同嚟到隆堡蘭桂坊酒店一嚐6月嘅新菜單。隆堡蘭桂坊酒店屬於精品酒店，簡單嚟講就喺講型格，提供個人化服務嘅酒店。而位處酒店頂層（29/30樓）嘅Azure喺酒店唯一自家品牌嘅酒吧餐廳，29樓主要喺酒吧區，至於30樓既為餐廳（11:00pm前），又喺酒吧（11:00pm後就會變身為有中央大舞池嘅酒吧，又有駐場DJ打碟），配合埋英式風格嘅裝修，以及外面猶如紐約曼哈頓景致，真喺環境已得人歡心 。唔講唔知，餐廳原來獲獎無數，例如：英國星期日泰晤士報評選為「全球20大最佳空中酒吧」之一、Asia Tatler 評選為2008-2013年度「香港及澳門最佳食府」之一……，所以絕對唔可以睇小。所以一啲品牌商戶，仲會特意晌度搞發佈會，甚至乎搞時裝表演都有 ，餐廳嘅可塑性甚高。除散點菜牌外，Azure嘅晚餐每月都會更換一次，盡量以時令食材入饌
隆堡蘭桂坊酒店屬於精品酒店，簡單嚟講就喺講型格，提供個人化服務嘅酒店。而位處酒店頂層（29/30樓）嘅Azure喺酒店唯一自家品牌嘅酒吧餐廳，29樓主要喺酒吧區，至於30樓既為餐廳（11:00pm前），又喺酒吧（11:00pm後就會變身為有中央大舞池嘅酒吧，又有駐場DJ打碟），配合埋英式風格嘅裝修，以及外面猶如紐約曼哈頓景致，真喺環境已得人歡心 。唔講唔知，餐廳原來獲獎無數，例如：英國星期日泰晤士報評選為「全球20大最佳空中酒吧」之一、Asia Tatler 評選為2008-2013年度「香港及澳門最佳食府」之一……，所以絕對唔可以睇小。所以一啲品牌商戶，仲會特意晌度搞發佈會，甚至乎搞時裝表演都有 ，餐廳嘅可塑性甚高。
除散點菜牌外，Azure嘅晚餐每月都會更換一次，盡量以時令食材入饌，令食客有更多新鮮感及不同味道嘅體驗。今次所品嚐嘅晚餐，由新到任嘅墨西哥行政總廚Roger Perez負責，超大隻嘅Roger為人頗風趣，而新推出嘅4道菜晚餐，已包括：精選麵包籃、餐湯、海鮮拼盤、主菜（4揀1）、甜品、餐飲伴法式小甜餅，定價為每位$468（+$10%），計及環境、服務，以至食物嘅特色及質素，用料……等等，絕對可以列入慶祝特別日子之選 ，當然花費得起又對食物有要求嘅朋友，閒時跟三五知己嚟食吓飯，相信一定滿足到你！
精選麵包籃‧三色牛油‧鵝肝慕絲 麵包全是自家製，包括幾款小麥包及芝士條，前者軟熟有質感，後者鬆脆帶鹹香，相當有水準。塗料配上別緻嘅三色牛油，味道就分別喺蒜蓉、乾蕃茄及香草，不單止睇落得意，仲各有特式，以乾蕃茄較得小弟歡心，因為跟牛油嘅油香挺平衡 ；另外，仲有一小匙鵝肝慕絲，伴有一片車厘子及開心果仁碎，所以，就咁淨食都得，不過我就用嚟搽麵包，鵝肝慕絲非常柔滑甘香 。
Almond - Truffle Soup（杏仁白松露忌廉湯） 餐牌只有英文，所以菜式名稱以英文為準。嘩！飲「白湯」飲到又杏仁又白松露何其矜貴，仲要侍應即席堂前以茶壺沖湯，夠晒玩味呀 ！咪以為得個整色整水，其實以茶壺保溫，令沖出嚟湯中嘅杏仁香氣特別突出，凝浮於空氣之中，而入口細滑輕柔，杏仁味非常之濃郁，相對啲哋白松露就幽香隱若，賣相脫俗，很滿意嘅一客餐湯 。
Fresh Oyster, Steamed Crab Leg & Steamed Shrimp Platter（海鮮拼盤） 頭盤以海鮮拼盤坐陣，真喺用料捨得，海鮮嚟自法國或意大利貨式，質素有一定保證，而每一客海鮮拼盤已包括兩隻新鮮生蠔、兩隻海蝦及一隻長蟹腳（好彩嘅話仲可能喺隻蟹鉗添），全部冰鎮上枱。佐料分別喺紅醋、茄汁加「辣椒仔」及檸檬，生蠔厚肉又帶海水鹹鮮，海蝦鮮甜爽彈，至於長蟹腳肉質清爽。有食友唔食生蠔，小弟就更加恭敬不如從命，有殺無賠，多啲嚟密啲口，爽呀 ！
主菜4揀1，款式有意式雲吞、牛脊肉、羊架及意大利飯，但考慮到有啲客人真喺對飯或意粉、紅肉都唔多喜歡，小弟愚見認為大可加入一款魚類作為「保險」之選。Mussels Ravioli（青口意式雲吞）
手做嘅青口意式雲吞，外皮厚得嚟煙韌有咬口，內裡填滿青口粒及青蔥，口感不俗；個菜式最特別之處喺個醬汁「蕃茄白汁」（Tomato – Béchamel Sauce），味道酸香，再伴以火箭菜，感覺更清爽 。兩旁加入咗份子料理嘅「露絲瑪莉魚子醬」，清徹淡白，點點草香，跟雲吞同食，又有另一番韻味 。
Veal Tenderloin & Rose Petals（慢煮牛脊肉伴玫瑰花瓣） 賣相極漂亮嘅一道主菜，以好多食用花作裝飾。牛脊肉經過慢煮後薄切上碟，色澤仍帶有點點粉嫩，肉質鬆軟細嫩富牛肉味，而以玫瑰花所做嘅醬汁，渾然天成就有啲誇，但可以話喺味道天然清香，跟牛脊肉都幾夾 。配菜嘅仲有焦糖無花果、烤鮮露筍、杏仁薯蓉，都喺有心思嘅配搭，不但增添賣相嘅可觀性，更令整體味道、口感層次化 。
Pistachio Lamb（烤開心果仁羊架） 另一道賣相標緻又挺立體嘅主菜「烤羊架」，一客有兩支羊架，以往很多時候羊架均以香草作為醃料包住嚟燒，今次特別喺改用開心果仁碎黏滿羊架嚟燒，燒羊架火喉拿捏準繩，肉質色澤粉嫩，鬆軟唔羶，表面嘅開心果碎增加咗點點果仁香味，又較之多添份咬口感 ；配菜亦有一番心思嘅配搭，鮮露筍、甘筍條、薯仔球、仲有亞枝竹，唔止好睇，亦都好食，正呀 ！
Strawberry Risotto（草莓意大利飯） 野菌意大利飯最常食到，但「士多啤梨」就第一次試喇 ，咁破格嘅組合究竟喺點樣？究竟喺咩味？真喺好期待！以士多啤梨汁、忌廉打造嘅意大利飯，上枱時已有種別樹一幟嘅感覺，因為佢實在好「粉紅」，甚有少女羞澀嘅樣子，食落口感濕潤，但飯粒咬口，帶有濃濃嘅士多啤梨清甜，雖然有少少食甜品嘅味道，但又唔會感覺好突兀，都真喺一個幾大膽嘅嘗試 。
Deconstructed Raspberry Tart（紅莓撻） 從選材、製作、造型都甚具創意，又好有藝術色彩，一件「解構」咗嘅「紅莓撻」，有點癲覆常理 。碟嘅兩邊好似「金寶」（Crumble）嘅嘢就喺「撻肉」，伴以新鮮酸甜嘅紅莓粒、挺實嘅玫瑰慕絲粒（粉紅色嗰粒就喺喇），襯以玫瑰花瓣、食用花作裝飾，好有視覺效果 。而中間嘅巴馬臣芝士雪葩更有種神來之筆嘅感覺，芝士味非常搶，又有啲粒粒芝士口感，十分有趣，令人驚喜嘅甜品作品 。
鮮奶咖啡 Latte鮮奶咖啡喺小弟慣常飯後餐飲，雖然無拉花，無公仔，外表平庸，但奶泡尚算豐厚，咖啡醇香唔錯！
Petit Four（法式小甜餅）
陪襯咖啡有法式小甜餅，以手功做黑朱古力粒、迷你朱古力馬卡龍、朱古力泡芙作結，朱古力迷實開心死 ，當然都好對小弟嘅胃口，所以我都唔客氣喇！黑朱古力粒各有唔同造型，濃郁甘苦而不甜膩；馬卡龍閃爧光澤，煙韌少甜，較合港人口味；泡芙屬大路啲，但一口一件，鬆軟不俗。
晌度，再次多謝食友嘅引薦，等小弟可以同班好姊妹品嚐到Azure嘅出品；又多謝公關嘅款待及細心嘅安排，令我哋一眾可以慢慢傾、慢慢嘆此醉人晚宴；當然唔少得多謝埋行政總廚Roger啦，設計出咁有心思、又咁有質素嘅菜式。總之，成件事就正如主題：「星空下的曼哈頓．奇妙晚餐」 ！此外，Azure每日仲有愝意嘅半自助午餐供應，多款精選自助前菜、豪華海鮮拼盤、即點即製主菜（6揀1，每星期轉款），加埋琳瑯滿目嘅自助甜品、茶啡，用Openrice優惠券每兩位先至喺HK$338（父親節每兩位HK$388。）。每位額外俾多HK$98，餐酒、汽水無限量供應添，信用卡結
仲有85折喎，真喺頗划算！如果想經濟啲嚟感受吓個環境及氣氛，仲有個入門輕盈版，就喺嚟「高茶」，星期一至日都有，2:30 – 6:00pm，一位收HK$148，兩位收HK$268，最可惜喺暫時未有折扣優惠，但定價都好合理。
張貼
