鮨心 ，旬節 (已結業)

好耐都冇食過日本菜，今次就試吓呢一間食廚師發辦嘅鮨心旬菜。呢兩年都試過好多唔同嘅廚師發板，當中有平有貴有好食嘅，希望呢間唔好令我地失望啦！前菜有六道，印象最深刻嘅就係螢光魷魚同埋秋葵。螢光魷魚非常彈牙亦都好鮮甜，而秋葵佢配上一啲甜甜地鹹鹹地嘅魚仔，咬落去有爽口但係又有秋葵一啲潺潺嘅感覺好夾呀！刺身就有三款，油甘魚、拖羅同牡丹蝦。三款都一樣非常之鮮甜，但係我哋最鍾意嘅都係拖羅！如果牡丹蝦揸埋個頭俾我哋食就更正啦！熟食方面，師傅整左二人份嘅燒吞拿魚俾我哋食。同行朋友唔係好鍾意食熟魚，啱晒我！成份吞拿魚我差唔多食晒，油香滿滿的，嗰陣油香歷久不散！另外，仲有一個茶碗蒸，但係太好味我食晒都唔記得影相！三款壽司入面，朋友最鍾意嘅就係海膽，而我呢最鍾意都係拖羅！師傅好細心咁已經將醬油同啲飯混合埋一齊，放入口味道啱啱好！食完壽司，店員為我地送上一碗熱辣辣嘅大蜆味噌湯。不過同朋友都覺得略為濃味咗少少。最後甜品，師傅都將唔同嘅配搭放埋一齊。尤其朱古力入面包住一啲柚子，好refreshing! 朋友就非常之鍾意個雪糕，而我，都好鍾意用櫻花葉包住嘅嘅飯。好滿足嘅一晚呀！