卷王 (已結業)

雖然呢間晌肥姐小食店對面嘅卷王已經開咗幾耐,但我係最近先發現佢,呢日就過嚟試吓.佢哋係日式手卷做主打,另外仲有幾款丼飯,同埋係全部外賣,不過可以晌唔影響其他人嘅情況下晌舖出面立食.我晌三十多款日式手卷之中揀咗兩款,即叫即做,等咗陣就完成,店員仲用手卷架咁上.海膽三文魚籽手卷,上面嘅海膽呈橙黃色,同埋係完整一瓣,體積仲要唔細,食落甘香質感creamy.三文魚籽幾多,咬開即爆有口感,仲多添幾分鹹鮮味.油甘魚帆立貝手卷,油甘魚切得厚薄啱啱好,肥美嫩滑.帆立貝同樣肉厚,微爽鮮甜.兩款手卷上面嘅刺身下面都墊咗爽脆嘅青瓜絲,咁樣就可以中和一下.起初拎起手卷嗰陣感覺到壽司飯有啲微溫,當中嘅壽司醋份量啱啱好,唔會太酸,味道又唔單薄. 啱啱開始食嘅時候紫菜脆卜卜,但始終女仔個口唔大,要四五啖先食得晒,因為咁尾段嘅紫菜已經變到較為煙韌,感覺上食手卷都係男仔會比較在行啲啲.佢哋仲有提供豉油同自家製嘅辣豉油,即係豉油撈芥辣,仲分咗小辣同大辣,同埋用喞樽載住,加晌手卷上就更加方便.我小試咗啲小辣,辣度對我嚟講夠過癮又唔會太過攻鼻.佢哋嘅手卷唔過大亦唔太少,刺身按比例嚟講夠多,作為小食都唔錯.