塚田農場 (已結業)

住左沙田咁耐，都從未光顧過呢間餐廳，今日媽媽話想食日本野，就打算帶佢黎呢度試下啦。海老牛油果美人卷：用米紙包住生菜、海老、玉子、牛油果同蟹柳嘅美人卷，口感豐富，配上熱帶醋同柑橘嘅特製醬汁，入口酸酸甜甜，感覺相當清新。沖繩糖揚魷魚配七味沙律醬：廚師使用左沖繩和奄美近郊海域捕獲嘅魷魚，外皮香脆， 食落肉嫩多汁，充滿日式風味。三文魚蟹肉沙律壽司卷：壽司細細粒，賣相相當精緻，一啖一粒，好可愛，壽司卷上加入蟹肉及蟹籽，裡面仲夾左青瓜，口感豐富，食落好清新。蒲燒鰻魚框飯：框飯份量唔多，飯係由白米同糯米混合整成，入口煙韌黏口。飯上面仲放有啲蛋絲、蘿蔔絲同埋鰻魚，食起黎帶淡淡嘅醬油味，整體配搭唔錯。安納烤甜薯芭菲：甜薯烤過後加入雪榚、丸子同粟米片，賣相吸引，做法亦都相當新穎，雪榚牛奶嘅味道配上帶餘溫嘅蕃薯，入口甜甜地，配上香脆嘅粟米片，相當有口感，味道唔錯，為我地今晚嘅晚餐劃上完美句號。