燒肉King (已結業)

近排日日都落雨，加上天氣陰陰寒寒，好想去食燒肉暖吓胃！上網搵到旺角呢間口碑唔錯嘅「燒肉KING」。餐廳主打日式一人無煙燒肉，午市套餐有多款肉類部位可供選擇，最平 $48 即有交易，非常經濟抵食，一於 Book 檯去試吓！店內裝潢採木質簡約風，環境明亮，簡潔乾淨，加上場內設有先進嘅抽風系統，所以就算用餐過後也不怕一身油煙味。點咗兩個午餐 C & E，每份定食都會配有御飯、和風湯及和式前菜。另外檯上亦放有燒肉汁、即磨岩鹽同黑椒粒等，客人可以因應自己嘅喜好，用來配燒肉吃。C餐：牛五花、豬五花、雞腿肉 150g $62牛五花肥美薄切，脂肪比例亦啱啱好，只需輕輕一燒就食得，入口香甜嫩身。豬五花爽滑富彈性，燒後軟腍入味、多汁有嚼勁。雞腿肉厚度十足，燒烤後外脆內嫩。E餐：極上美國牛小排、牛舌、牛五花 220g $138牛小排油花綿密均勻，肉質柔軟鮮嫩，燒烤後肉味非常濃郁，入口香味四溢。另外牛舌水準亦唔錯，唔單止肥大肉厚，而且質地爽彈不韌，入口充滿油脂芳香。順帶一提，店裡嘅御飯係採用日本富山縣產嘅天盛米炮製，飯粒食落甘甜軟糯，即使放涼了才吃，也同樣美味。