三河屋 (已結業)

三河屋走勢持續凌厲, 連續幾個月打入頭十名的食店, 我身為紅磡的老街坊當然要去試一試。事源上星期某日臨放工, 母親大人才告知原來她在屋企竹戰, 一想起要食外賣兼聴住麻雀聲睇電視, 就把心一横叫埋阿妹在附近揾食。大約七點, 行到去三河屋, 竟然無人排隊, 立即行埋去一探究竟, 有位有位, 一坐低有熱茶, 是膠杯, 有點不環保, 而且都有點破壞左間店的氣氛。兩個女仔, 都知不會食得多, 就簡單一個 "北海道忌廉吉列豬扒飯" + "叉燒拉麵" + "炸薯餅" (阿妹最愛)。食物都算快到, 最先來的係拉麵, 湯底夠味, 不會好多油, 麵有咬口, 但叉燒太甜.......甜得有點像加左糖.......豬扒飯很正, 外皮炸得脆卜卜, 忌廉有好香的粟米味, 正中阿妹下懷, 加上珍珠米, 真的好好味。不過豬扒同飯同汁放在一起, 食到一半時剩下的豬扒外皮已經冧了, 明白是必然會發生的事, 但還是有點感到可惜。炸薯餅外皮炸得好脆, 餡料有薯仔茸, 看得出是用薯仔加其他材料打成, 不會成碟油, ok 好味。因為得兩個女仔, 無叫天婦羅及關東煮, 一定要再找機會來試其他食物。男友更已經報名下次一定要等埋他呢﹗