碗盛 (已結業)

位於天后嘅日式餐廳，一入到去，已經覺得裝修好日式，佢仲有間房係榻榻米嘅裝修，應該只有一早book先至可以坐到。清酒combo: 有三個shot, 第一杯係配前菜，第二杯係配串燒，第三杯係配拉麵。一杯比一杯濃，入口唔會太烈 女仔都岩飲。沖繩水雲漬：之前去沖繩旅行都食過，估唔到香港都有，我覺得佢呢次做得俾我係沖繩個次食得嘅更好，佢加咗啲醋同檸檬汁喺調味，發覺做得非常之好味同開胃。串燒：叫咗五花腩，雞腎，牛舌，白鱔。每一樣都做得好出色，配上清酒一齊食，另一番享受。特別想講嘅係白鱔，非常之鮮味。加埋杯清酒真係好夾。炸蠔：一咬落去啲肉汁就爆曬出來，好好食。佢嘅醬汁係Tartar Sauce，正。天婦羅雜錦 有炸蝦，冬菇，茄子，南瓜同埋番薯。每一樣都做得唔錯 個籃都好可愛牛小排拉麵：店員介紹湯底冇味精，我飲落去又的確唔會口乾。佢嘅牛小排燒得好好食好香，而每一片佢都切得好薄，所以口感亦都好好。整體而言，食物唔錯，服務好好，好有日式居酒屋感覺，價錢適中。