塩玉居酒屋 (已結業)

上星期三放工，同女朋友兩個人出銅鑼灣食好西，試咗塩玉居酒屋 Shiotama。兩個人點咗8道菜，埋單盛惠HK$1212，人均消費HK$616。好在早訂咗枱，收工7點半去到都差不多滿座。侍應帶我哋到bar 枱坐，聞到一陣又一陣香味，就知無嚟錯。睇過menu就點咗8個誠意推介: 日本溫室蕃茄田園沙律、蔥呑拿魚腩薄脆、黑松露白身魚薄切、飛機壽司拼盤、茶壺海鮮湯、燒佐賀產和牛、鵝肝釀雞翼同黑松露甜蝦卷。首先嚟嘅係沙律，蕃茄清甜唔會好酸，啱晒做開胃菜。跟住嘅就係蔥呑拿魚腩薄脆，食嘅時候唔好點豉油，滴啲青檸就可以食到呑拿魚嘅鮮味，呑拿魚腩同薄脆口感強烈對比好特別。再嚟黑松露白身魚薄切、飛機壽司拼盤同黑松露甜蝦卷。一次過試到唔同魚生，好滿足！最估唔到係黑松露同魚生係咁夾。之後燒佐賀產和牛、鵝肝釀雞翼同茶壺海鮮湯一齊嚟。和牛入口即溶，齒頰留香。鵝肝雞翼多汁，好juicy。海鮮湯好特別，用茶壺上，魚湯夠熱唔會腥，倒出嚟一邊食串燒一邊飲好過癮。整體而言，食物質素高，食材矜貴，但服務態度方面則可再作改善。