九龍城確實係一個美食集中地，今次呢間火鍋店真係令人讚不絕口!
火鍋湯底有20多個，而今次選擇左椰子雞鍋，非常足料，雞隻採用新鮮雞，肉質鮮嫩滑溜。水滾起來，椰香味撲鼻。
海鮮拼盤$98，有足五款海鮮：龍蝦、鮑魚、蠔、蟶子、蝦，望埋去已經流晒口水，鮑魚同龍蝦上檯時仲係好生猛，彈下彈下，真係從未試過咁新鮮嘅海鮮火鍋，又大又抵食，無得彈
頂級手切牛肉味十足，油脂分佈平均，口感嫩滑，老闆教落最好唔好灼得太熟，否則會影響肉質。
墨魚滑可以自由選擇加黑松露或白松露，今次揀左白松露，mix埋一齊味道好香，爽口Q彈。
手打五寶丸，客人選擇加$10可以有芝士/麥提莎/黑松露/白松露饀料，今次揀左黑松露同麥提莎，松露味突出，而麥提莎味道新穎，老闆仲會特別教客人灼2分鐘左右，效果係最好，墨魚丸剛剛熟，麥提莎依然脆口，但有流心效果。
雲吞必食之選，蝦肉粒粒新鮮爽口，真係好味至極。
所有食物都好新鮮，絕對一讚
