溪羽之茶 (已結業)

之前見到呢間飲品店，最初開嘅時候，都好多人排隊。最近唔知係咪因為熱潮冷卻左少少，所以最近行過，都唔覺好多人排隊。今日喺附近食完燒肉，感覺比較熱氣，所以都想飲杯果汁解解膩，於是醒起溪羽之茶。我見好多人都係飲佢地嘅士多啤梨沙冰，但由於我自己想飲啲比較清涼解渴嘅飲品，所以我揀左西瓜特飲。西瓜特飲 $38落單後，即時製作，大約等左幾分鐘啦。飲品都幾大杯，其實就係將西瓜起肉，打碎冰，做出類似西瓜沙冰。冰塊打得唔算細碎，瓶口較細，未溶化前更加有少少塞住，其後啲冰溶咁啲，就飲得較暢順。裡面飲到有西瓜肉，感覺冇乜加人造糖水，因為本身西瓜都幾夠甜、水份多。價錢黎講，38蚊都算幾大杯，比起我喺生果鋪叫杯鮮榨果汁廿幾蚊可能大杯一半，抵唔抵就見仁見智啦，我地兩個人share一杯就覺得ok啦。