每位$388 每人有半邊龍蝦，半隻蟹，貴妃蚌，北寄貝，元貝，鱔，九節蝦，黃金蜆，蔬菜同埋海鮮粥底
海鮮上枱嘅時候，絕對感受到店家嘅專業同誠意，因為所有貝類都清洗得非常乾淨，連鮑魚所有邊位係白𠽌𠽌！作為一個潔癖人都自愧不如。。。
最重要係所有海鮮都係當日店主親自採購處理，非常新鮮。 黃金蜆同所有貝類都冇沙，唔需要點任何醬汁或者豉油，完全食到海鮮嘅鮮甜味。
店主好體貼，除咗有非常詳細嘅講解，仲喺中段時間先奉上新鮮劏嘅龍蝦，所以肉質非常鮮甜彈牙。
除套餐嘅食物之外，我哋額外加咗安格斯牛肉同埋雞件。雞件醃味適中而且非常嫩滑。
最後嘅海鮮粥亦都係亮點，有唔同嘅配料可以加落去。 但粥底嘅珍珠米同腐竹，加上海鮮精華已經非常吸引，鮮甜唔過鹹，唔似坊間不斷滚住嘅海鮮粥咁鹹。
明明中段有大部份嘅人已經覺得好飽，但結果都食咗兩碗粥🤣🤣🤣
食物份量非常足夠結果都食唔晒要打包。
誠意推薦！必定再訪！
