永遠都處於好想食日本野嘅我睇咗呢間餐廳擺門口嘅menu覺得都唔錯
再望入去餐廳，原來差唔多坐滿晒人，得返最後兩個位
其他餐廳都無乜客，呢間咁多人，根據邊度人多就食邊嘅定律，質素一定有返咁上下！咁就入去啦～
大部分定食都係$100鬆啲，喺銅鑼灣來講個價都算合理
嗌咗油甘魚＆藍鰭吞拿魚二色丼壽司飯定食
仲有粒粒海鮮壽司飯定食
定食有跟前菜（日式沙律），醃海帶，唔錯
隔離遲過我哋入來，跟嘅前菜唔一樣，可能係有幾款（？！）
漬物係兩片醃蘿蔔，仲有麵豉湯同茶碗蒸
粒粒海鮮最啱好似我咁，貪心想食多幾款魚生嘅人
非常足料，但係魚生粒粒醃過，醃汁蓋過咗魚生本身嘅鮮味
鍾意食鮮味魚生嘅就應該揀油甘魚＆藍鰭吞拿魚二色丼壽司飯定食
兩款魚生鋪滿飯面
新鮮香甜，而且魚生係厚切嘅，絶對唔會驚唔夠飽！
食完離開餐廳嘅時候，見到條龍已經排到好長～
午餐時間經過附近，而條隊唔長嘅話，一定會再試！
