茶屋町 (長沙灣道) (已結業)

深水埗大馬路最近開咗呢間日本嘢，晚晚經過都大排長龍，今晚一於試試佢咩料子。先來兩個丼飯，六十幾蚊來講又真係幾抵食。咖喱吉列芝士黑豚，芝士輕輕流出來，豚肉入味，海帶份量超級多，玉子都夠juicy。海膽蟹肉意大利粉，無啦啦有粒大福又幾搞笑（不過粒大福好好食，軟糯而且夾心唔太甜）蟹蓋夠熱辣辣，意粉沾滿海膽醬，原來海膽醬係帶有少少沙律同芥末嘅味道，又幾開胃。套餐仲包麵豉湯，好濃味，過晒想飲日本湯嘅口癮。成餐嘅重點當然係日本抹茶雪糕，四十五蚊有兩個口味，仲有紅豆，大福，玉子，穀物，曲奇，好吸引！大福玉子固然好食，雪糕淡淡奶香，抹茶穀物就真係第一次食，而且最特別係有紅梅口味，酸酸地同綠茶又幾夾。