八拾台式串燒火鍋酒場 (已改名) 查看

創興廣場開咗間新嘅串燒店，營業時間至凌晨四點，店內環境大，空間感十足，可能啱開業，食物等候時間超長，基本上枱枱都齋坐，悶到同隔離傾偈傾到好開心，雖是如此，勝在食物質素高，材料來貨靚，若之後運作順利相信都會好生意。肉類方面要咗烤雞全翼、鹽燒雞中翼、鷄肉腸，而烤多春魚最為印象深刻，外層脆身，帶微微焦香，自己好難燒得好。之後到丸類，烤珍寶蟹柳皇、烤臺灣小香腸、烤臺灣香菇貢丸、烤鮮墨魚棒棒，全部咬落爽口彈牙，大粒飽滿。蔬菜類有烤茄子、烤韭菜、烤甜粟米，調味料十足，新鮮，鮮甜，無渣，食返啲菜中和吓都幾好。而澱粉產品估唔到最有驚喜，臺灣炒米粉條條分明，油度適中，好入味，肉條唔嚡、烤年糕煙煙韌韌，烤小饅頭外脆內軟熟，一定要點煉奶、最後唔好唔記得叫糖烤牛奶方包做甜品，烤至微微脆身但又唔會over咗，面頭灑上糖粉，甜甜哋，趁熱食真係好好味，令人一試難忘。希望下次去到運作更順暢啦😂