好叉好味 (宏利金融中心) (已結業)

<好叉好味>最近係觀塘開左分店，之前係網上見到啲圖片已經覺得好吸引，今次終於到我試！餐牌食物選項唔多，叉燒飯只有三種口味，分別為柚香、辛麻 & 焦蜜。餐廳堂食座位唔多，大概只有十個，所以見好多人都係買外賣走。而且依加購買叉燒飯仲送飲品添！焦蜜叉燒飯 $54包裝好特別，係一個圓筒紙盒，紙杯上面嘅豬仔公仔十分吸睛，好可愛！杯飯望落好似好細兜咁，但。。食落你就知！一打開蓋，就見到好多件叉燒圍住溫泉蛋，溫泉蛋煮到剛好，一叉落去好流心，好正！叉燒切粒上，烤到有微微焦香，雖然肉質偏瘦，但仍然保持到外脆肉嫩，好有口感，加上有蜜糖，所以味道特別甜。配埋菜飯食好正，比平時食白飯再多啲口感！食完第一層叉燒同菜飯，下面仲有一層叉燒同菜飯，好足料呀！絕對唔怕食到中間就會冇餸食，呢個飯對於男士黎講都一定夠飽。