湄南 (已結業)

見呢間新開既越南餐廳環境幾舒服，menu都有幾多特別菜式，決定同屋企人黎試下！越式生牛肉湯河食得多，有其他湯底揀真係第一次！除左清湯，仲有喇沙，沙嗲，咖哩，同蕃茄湯底，我鍾意試新野，就揀左喇沙湯底，雖然有別於傳統越南味道，不過就多左份馬來喇沙既惹味，幾有fusion特色，牛肉好薄，俾熱湯輕輕浸熟左唔會韌。馬來咖哩牛腩鍋，牛腩燜得軟腍，肥瘦適中，咖哩汁非常香濃惹味，送飯一流，不過我地又唔想食飯咁單調，就叫左蒜蓉包黎點咖哩，蒜蓉包烤得好脆身，其實本身都夠晒味，唔點咖哩既話都好好食。越南濱海配牛肉，食返一道正宗越南菜式，我第一次食，材料幾特別，一餅餅米粉上面有炸蒜蔥粒，用生菜包住米粉，紅蘿蔔絲同埋牛肉，牛肉夠厚身，幾有咬口，生菜好新鮮，平時食生菜包最怕俾啲霉晒又穿晒窿既生菜，呢道菜都幾清新，中和返喇沙同埋咖哩牛腩既濃味。可能餐廳新開，員工都比較生手，不過環境同食物唔錯，係比較新派既越南餐廳，值得一試！