Pinot Duck (已結業)

一早諗住週未去赤柱行下，所以提前搵定食咩好，見呢間食鴨出名所以決定去試下。因為一心諗住去食鴨，所以訂位時預早訂左半隻北京填鴨。可能期望太高所以呢碟北京填鴨老實講有少少失望，鴨肉比較實，薄餅亦唔算薄，味道就正常。跟著叫左黑松露蠔仔燉飯，好重黑松露味但就偏少蠔，唔係好夠料。再來西蘭花炒蝦球，蝦好大隻同好爽口，味道偏濃味。見到佢地有手工啤酒，所以叫左蜂蜜黑啤，啤酒唔太苦好易入口。最後叫左甜品，陳皮焦糖燉蛋和杞子酒糟炖天津梨。燉蛋整得好滑，加入少少陳皮味都幾夾。炖天津梨都唔錯，食落幾清甜又唔會太重酒味。餐廳環境好西式，燈火較昏暗所以感覺比較浪漫。