Ideas Dessert (已結業)

聖誕時節行開荃灣，食完晚餐梗係同女友搵甜品食。唔想食連鎖店/老牌子(怕多人)，搵勻openirice見佢好評幾多就決定係呢間啦。間鋪略為遠左D，係千式行過去要十分鐘左右，係熊貓酒店附近。8點入到去都已經坐滿左，鋪仔細細但係都唔怕無位，店舖外面可以加台，我黎食野之麻唔洗等梗無問題。商場怕悶局仲可以坐街食煙仔(雖然我唔食)。黎之前已經做晒research睇到好多人勁推佢既抹茶甜品。但係睇完餐牌先知佢新推焙茶產品，梗係貪新鮮就點左個焙茶心太軟。女友就點左個雪糕香芒豆腐花。豆花扎實香滑(唔係山水豆花)，芒果汁同芒果粒都香甜無酸味，雪糕食得出唔係cheap野(應該係D記)，三十蚊抵到爛。心太軟要等15到20分鐘，想食真係要等下或者一早嗌左先擇其他。心太軟一黎就聞到好香焗野(牛油)味，切落去都有流心，食落去真係無得頂，好香濃既焙茶，比起抹茶少左浸苦澀味多左浸焙茶獨有既香味。白玉好煙韌，紅豆一粒粒好完整不過略甜，兩樣配埋一齊就夾返晒。軟雪糕係3.6牛奶味，幾香滑又有奶味，肯定無溝水。咁有誠意又高質數既心太軟$6X，真係唔錯。下次黎到一定要試埋咁多人推介既抹茶心太軟同抹茶味軟雪糕。