丸和食堂 (已結業)

今日突然想食日本菜，同唔食魚生既男友黎左丸和食堂，兩個人基本上都係食熟食。丸和食堂個門口非常和風，幾別緻，我坐既卡位透住個窗望到出面樹景，幾寫意。第一碟菜係忌廉芝士蒲燒鰻魚飯卷，一開頭見到勁大舊忌廉芝士有嚇親，驚咬落有油膩感。但一食有驚喜，入面既青瓜中和左油膩既感覺，留低既反而係creamy既味道，鰻魚細細舊但都入味，好喜歡呢個飯卷。舊忌廉芝士真係神來之筆。第二碟係黑椒燒五花腩，簡單地用鹽同黑椒燒成既腩肉，唔錯。第三碟係蜜糖烤雞翼，蜜糖味唔係好出，反而有陣苦瓜味，幾神奇。第四碟個人都幾喜歡既橫濱芝士竹輪魚卷，芝士竹輪真係無可能唔好食，嗚，流心芝士。仲要外皮燒/炸到脆一脆，好香口。好啦到主菜，兩個都非常好食。個三文魚腩飯，三文魚腩皮燒得脆，又入味，魚腩油脂剛剛好，好軟身，唔柴，入口三文魚香就散開，好好食。而個豬軟骨拉面，拉面湯底有海帶味，幾清爽，面有彈性，咬落唔係軟林林咁斷開，非常好食。豬軟骨比既量都好多，我地食極都仲有既感覺，豬軟骨醃得較甜，好岩男友胃口。總括黎講，呢間性價比真係幾好，我個人最鐘意個忌廉芝士飯卷，一定會再幫襯！